Somalia :Koofur Galbeed oo ka hor timid go’aankii Maxkamada Sare

Maamulka Koofur Galbeed ayaa soo saaray warsaxaafadeed ay ku sheegayaan inay kaga soo horjeedaan qoraalkii kasoo baxay maxkamada sare ee dalka, kaasi oo ahaa in dib loogu laabto doorashada siddeed kursi oo baarlamaanka ka mid ah.

Wasiirka Hubka dhigista, Dhaqancelinta iyo Tababarada Maleeshiyaadka ee maamulka Koonfur Galbeed Xasan Xuseen (Eelaay) oo la hadlay warbaahinta ayaa sheegay mowqifka Koonfur Galbeed ay ka qabto arrintan in uu yahay mid ay kaga soo horjeedaan go’aankii Maxkamadda, ayna taageerayaan go’aankii Baarlamaanka ee ahaa in aan dib loo dooraneyn Kuraastaasi.

Inta badan xildhibaanadan waxaa laga soo doortay degaanada Koonfur Galbeed, mar aan weydiinay Wasiirka sababta ay u difaacayaan xildhibaanada, ee ay ku diidayaan in dib loo doorto ayuu sheegay Xildhibaanada hada in ay si sax ah u gudanayaan shaqadooda, hadana ay matalaan shacabka Soomaaliyeed.

“Mowqifka ay ka qabto Dowladda Koonfur Galbeed go’aankii Maxkamadda Sare ayaa ah mid aan kaga soo horjeedno arrintaas, waxaan taageereynaa Baarlamaanka Soomaaliya oo sheegay inaan dib loo dooraneyn 8-da kursi ee horey Doorashooda ay uga dhacday degaan Doorashooyinkeeda” Ayuu yiri Wasiirka

Dhanka kale Wasiirka Hubka dhigista, Dhaqancelinta iyo Tababarada Maleeshiyaadka ee maamulka Koonfur Galbeed ayaa sheegay mudooyinkii dambe in ay isa soo tarayeen Dhalinyarada Shabaab ka tirsan ee isku soo dhiibaya Koonfur Galbeed.

Wuxuu sheegay in ay diyaar u yihiin in ay gacmo furan ku soo dhaweeyaan Dhalinyarada Shabaabka ka tirsan ee isku soo dhiibaya Koonfur Galbeed, isaga oo Ciidanka Koonfur Galbeed ugu baaqay in ay kordhiyaan Howlgalada.

Magaalada Baydhabo
Magaalada Baydhabo

LEAVE A REPLY

Please enter your comment!
Please enter your name here