Shirka Istanbul oo maanta furmaya

Shirweynaha Istanbul ee loogaga hadlayo xaalada Soomaaliya ayaa lagu wadaa inuu maanta halkaasi ka furmo kadib marki ay dalka Turkiga wada gaareen madaxda caalamka iyo hogaamiyaasha Soomaalida.

Shirkani oo ah mid laba maalin ka socon doona magaalada Istanbul ee dalka Turkiga ayey dowlada Turkiga isku dayi doontaa in ay mar kale kusoo jeediso indhaha caalamka dalka Soomaaliya kadib marki sanadki 2011 si weyn oo walaaltinimo leh ugu soo gurmatay abaarihi ku dhiftay.

Hogaamiyaasha dhaqan, ganacsatada, qurba joogta iyo kooxaha ururada bulshada rayidka ah ayaa iyaguna goob joog ah oo ka qeybgalaya.

Waxyaabaha la filayo in lagu lafa guro ayaa waxaa ka mid ah dhameynta waqtiga kumeel gaarka ee dowlada ay taageerto Qaramada Midoobay oo lagu wado in waqtigeedu dhamaado bisha August.

Ajandaha loogaga hadli doono shirka waa mid la mid ah ajandayaashii lagu soo lafa guray shirarki waaweynaa ee horay loogu soo qabtay dalal kala duwan ee ay dhawaanahaan madaxda Soomaalida yeelatay.

Laakin Turkigu ayaa aad loogu raja weyn yahay inuu ka duwanaan doono dalalki hore usoo marti geliyey shiradka Soomaalida, sababtoo ah aad ayey uga go,antahay isbadal sax ah oo ku yimaada siyaasada Soomaaliya.

Inti lagu guda jiray abaarti sanadki hore garaacday Soomaaliya waxaa booqasho taariikhi ah ku yimid ra’isulwasaare Recep Tayyip Erdogan iyo xaaskiisa, waxa uu noqday Erdogan hogaamiyihi ugu horeeyey oo ka baxsan Qaarada Africa oo Muqdisho booqda mudo 20 sana ah.

Wixi markaasi ka danbeeyey Turkey waxa uu ka bilaabay Muqdisho mashaariic xaga horumarinta ah sida dayactirka dhismooyinka, wadooyinka, iskuulada iyo isbitaalada.

Shirkaan waxaa ka qeybgalaya madaxda dowlada KMGS, hogaamiyaasha maamulada Puntland, Somaliland, Galmudug iyo ergoo ka socota ururka Ahlu Sunna Waljamaaca.
Xafiiska Wararka Midnimo, webmaster@midnimo.com
midnimo12@googlemail.com.