Dowlada KMG Soomaaliya oo cambaareysay qaraxi Dhuusamareeb

Ra’isulwasaaraha Soomaalia Cabdiwali Maxamed Cali ayaa cambaareeyey weerarki ismiidaaminta ahaa ee maanta lagu qaaday xildhibaano iyo siyaasiyiin ku sugnaa maqaayad ku taala magaalada Dhuusamareeb.

Dr. C/wali ayaa cambaareeyey qaraxa kadib shir jaraa’id oo uu caawa ku qabtay xafiiskiisa magaalada Muqdisho, isaga oo ku tilmaamay mid wuxushnima ah oo ka dhan ahaa shacabka iyo dadnimada Soomaaliyeed.

Afhayeenka xukumada  C/raxmaan Cumar Cismaan (Eng: Yariisow) oo isna ka hadlay dhacdadi maanta ayaa Saxaafadda u sheegay in dowlada ay ka xuntahay qaraxii galabta ka dhacay Magaalada Dhuuso mareeb ee gobalka Galgaduud kaa oo ay dhimasho iyo dhaawac ka soo gaaray qaar katirsan xildhibaanada dowladda KMG Soomaaliya.

Wuxuu kaloo Afhayeenka sheegay in Xildhibaan Yuusuf Mire Seeraar iyo Xildhibaan C/wali Aw-Muxumed ay ku dhinteen qaraxaasi islamarkaana uu ku dhaawacmay Axmed C/salaam oo Xukuumadii hore ka noqday Ra’iisul Wasaare ku xigeen iyo mas’uuliyiin kale.

Wuxuuna sidoo kale sheegay Afhayeenka in Shacabka Soomaaliyeed intaan ka dib aysan u dul-qaadan doono in kooxaha nabad diidka ah ay sii joogteeyaan falalkooda argagaxisada ah. Dowladdu waxey sii kordhin doontaa howlgalada looga soo horjeedo kooxdan caadeysatay inay shacabka gumaadaan.

Dhinaca kale Afhayeenka ayaa tilmaamay in Warsaxaafadeed ka soo baxay UN-ka, AU iyo IGAD lagu sheegay in cidii ka hortimaada Road-map-ka tilaaba cadd laga qaadi doono islamarkaana loo aqoonsanayo qaswadayaal.

Ugu dambeyntii Afhayeenka dowladda KMG Soomaaliya ayaa ugu baaqay shacabka Soomaaliyeed iney taageeraan hanaanka looga baxayo Kumeel Gaarnimadda islamarkaana ay ka shaqeyaan sidii loo heli lahaa dowladda rasmi ah.

Xafiiska Wararka Midnimo, webmaster@midnimo.com
midnimo12@googlemail.com.