Faroole oo furay dhimaha cusub ee madaxtoyadda Puntland

Madaxweynaha maamulka Puntland Cabdiraxmaan Maxamed Maxamuud Faroole ayaa furay dhismaha cusub ee madaxtooyada Puntland.

Dhismaha madaxtooyadda cusub ayaa laga dhisay magaalada Garoowe oo ah xarunta maamulka Puntland.

Munaasabadda xarigga looga jarayay dhismaha madaxtooyada cusub waxaa ka qeyb-galay madax ka tirsan Puntland, Qaramada Midoobay, Itoobiya iyo qeybaha bulshada

Madaxtooyada cusub oo dhismaheedu uu socday muddo ka badan hal sano ayaa ka kooban labo aqal oo loogu talagalay inay kala degaan madaxweynaha iyo ku xigeenkiisa, xafiisyo iyo waaxyo loogu talagalay saraakiisha iyo ciidanka madaxtooyada.

Xafiisyada madaxtooyada ayaa durbaba loo raray dhismaha madaxtooyada cusub ee Puntland.

Madaxweyne Faroole oo ka hadlay xafladda ayaa sheegay in dhismaha madaxtooyada cusub uu qeyb ka yahay waxqabadka iyo horumarrada ay ku tallaabsatay xukuumaddiisa, isagoo sheegay in heer gunaanad ah uu marayo dhismaha xarunta warbaahinta Puntland.

”Waxaan bogaadinaya shirka Jubaland ,waxaana rajeynayaa inay u dhistaan maamulkooda si nabadgeliyo kana mid noqdaan DF Somalia” ayuu yiri Farole.

Wuxuu kaloo sheegay inay dhowaan billaabi doonaan dhismaha garoomada diyaaradaha ee Boosaaso iyo Garoowe.

Kooxda Waaberi Puntland ayaa suugaan Puntland iyo geedi socodkeeda hanaanka axsaabta looga hadlayey goobta ku soo bandhigtey kuwaasi oo soo jiitey dareenka dadkii ka qaybgalay xaflada.

Xafiiska Wararka Midnimo, webmaster@midnimo.com

midnimo12@googlemail.com